Ca. İyn 4th, 2020

Deputatlığa namizəd Əzimağa İbrahimovla müsahibə

44 SAYLI SUMQAYIT-XIZI SEÇKİ DAİRƏSİNDƏN

DEPUTATLIĞA NAMİZƏD İBRAHİMOV ƏZİMAĞA İLƏ MÜSAHİBƏ

 

  • Əzimağa müəllim, icazənizlə müsahibəyə Sizi tanıyaraq başlayardıq. Kimdir Əzimağa İbrahimov?

İlk öncə təşəkkür etmək istərdim bizə yaratdığınız bu imkan üçün. Düşünürəm ki, kütləvi informasiya vasitələrində deputatlığa namizədlərə ayrılmış hər bir imkan namizədlərin vətəndaşlara tanıdılması və nəticədə seçkilərə marağın güclənməsinə xidmət edir.

Qısa olaraq özüm haqqımda. 1984-cü ildə Sumqayıt şəhərində anadan olmuşam. Orta təhsilimi Sumqayıtda tamamlamışam. Ardınca Bakı Dövlət Universitetində beynəlxlaq hüquq ixtisası üzrə bakalavr, daha sonra  İstanbul Universitetində magistr pilləsi üzrə təhsil almışam. Eyni zamanda biznesin idarəolunması üzrə magistr (MBA) dərəcəm də var.

Uzun müddət özəl sektorda hüquq sahəsində fəaliyyət göstərmişəm. Hazırda da bu sahədə fəaliyyətimi davam etdiriəm.

 

  • Belə aydın olur ki, elə məhz bu səbəbdən 44 saylı dairədən namizədliyinizi irəli sürmüsünüz? Doğrudurmu?

Bəli. Tamamilə haqlısınız. Qeyd etdiyim kimi, Sumqayıtda anadan olmuşam. Burada təhsil almışam. Hətta müəyyən müddət peşəkar fəaliyyətim də bir müddət Sumqayıtla bağlı olub. Bununla yanaşı Xızı rayonu ilə də sıx bağlılığım mövcuddur. Əslən Xızıdanam. Yaxın qohumlarımın bir hissəsi hazırda da Xızıda yaşayır. Deyə bilərəm ki, həyatımın böyük bir hissəsi Sumqayıt və Xızı ilə bağlıdır. Və məhz bu səbəbdən aid olduğum, bələd olduğum, insanlarını, iqtisadiyyatını, problemlərini tanıdığım bu dairədən  namizədliyimi irəli sürmüşəm. Hesab edirəm ki, doğru olan da budur. Seçicilərlə namizəd arasında hüquqi təmsilçilik ilə yanaşı, mənəvi bağ da olmalıdır. Bu bağ bizdə mövcuddür. Millət vəkilliyinə iddialı şəxs olmaqla yanaşı mən sıravı sakin, vətəndaş, “onlardan biri”yəm. Özümü belə hiss edirəm, seçicilər də məni belə görür.

Onu da əlavə edim ki, mən heç bir partiyanın üzvü deyiləm. Müstəqil namizəd kimi qatılıram seçkilərə.

 

  • Bəs, necə oldu ki, namizədliyinizi irəli sürmək qərarına gəldiniz? Buna sizi nə vadar etdi?

Burada əsas iki məsələni qeyd edə bilərəm – birincisi böyük planda (makro), ikincisi kiçik (mikro) planda.

Təbii ki, ilkin olaraq ölkə səviyyəsində aparaılan islahatlar, gənclərə duyulan böyük etimad və ciddi dəyişikliklərin planlaşdırılması və qərarlaşdırılması. Son dövrə aparılan kadr islahatları, yeni yanaşma bir gənc olaraq məni də ümidləndirir və ölkənin ictimai-siyasi fəaliyyətdində daha fəal iştirak etməyə ruhlandırır.

İkinci planda isə, vətəndaş olaraq bir çox nöqsan və çatışmazlıqların fərqində olmağım və onların aradan qaldırılmasında iştirak etmək istəyimi qeyd edə bilərəm. Son illərdə sosial medianın da vüsət alması ilə bərabər vətəndaşların aktivliyi daha da artmışdır. Artıq insanları narahat edən məsələlər qısa bir zamanda ictimailəşə bilir, ictimai qınağa məruz qala bilir. Şübhəsiz, gənclərin burada rolu çox böyükdür. Milli Məclis də dövlət ilə vətəndaş arasında artan bu ünsiyyətdə öz aktiv rolunu oynamalıdır. Bu da ancaq Milli Məclisdə dinamik, gənc, vətəndaşların dərdini öz dərdi kimi görən, peşəkar insanlarla mümkün ola bilər. Bu da öz növbəsində məni ruhlandırır və insanların səsi olmağa çağırır.

 

  • Namizədliyinizin təsdiq olunmasına qədərki mərhələ haqda nələr deyə bilərsiniz? Ümumi təəssüratınız necədir? Hər hansı təzyiq və ya ədalətsizliklə üzləşdiyinizi hesab edirsinizmi?

Əvvəla onu deyə bilərəm ki, bu mərhələdə DSK-nın fəaliyyətində mənə qarşı hər hansı bir qanunsuzluqla üzləşməmişəm , ümumilikdə prosesin əleyhinə işləyən ciddi bir nöqsan müşahidə etməmişəm. Ən azından mənim namizədliyimin qeydə alınmasında belə bir hal baş verməyib.

O ki, qaldı imzaların toplanmasına… Elə ilk addım və seçicilərlə ilk təmasımızdan sonra əmin olduq ki, doğru yoldayıq. Eyni zamanda gördük ki, həqiqətən xalqın dərdinə yanan, hər zaman onu eşitməyə hazır olan millət vəkillərinə necə də böyük ehtiyac var.

 

  • Qeyd etdiniz ki, heç bir partiyanın üzvü deyilsiniz. Bəs ümumilikdə siyasi baxışlarınızı necə xarakterizə edərdiniz?

Mənim baxışlarımın mərkəzində insan, yəni vətəndaş dayanır. Dövlət insan üçündür və əsas məqsədi vətəndaşlara xidmətdir. Millət vəkilliyinə iddialı şəxs kimi vətəndaşın yanında olmalıyıq.Dövlətimizə də sahib çıxmalıyıq və onun güclü olmasına çalışmalıyıq ki, nəticədə o, vətəndaşlara yüksək xidmət göstərə bilsin.

Hər zaman prosesləri bu çərçivədə qiymətləndirirəm. Düşünürəm ki, siyasətçi sərt, doqmatik ideolojik qəliblərdən azad olmalıdır. Xalqın mənafeyinə uyğun, dövlətin milli maraqlarına xidmət etdiyinə inandığı bütün ideya, təklif və siyasəti dəstəkləyə bilməlidir. Əminlikə deyə bilərəm ki, güclü sosial dövlətə inanıram. Məsələn, hamı üçün əlçatan və münasib təhsil, səhiyyə xidmətlərini tərəfdarıyam. Eləcə də, düşünürəm ki, aztəminatlı ailələrin, təqaüdçülərin sosial rifahının artırılmasında dövlət oynadığı böyük və əhəmiyyətli rolunu davam etdirməlidir.

Bütün bunlar üçün güclü dövlət əsas prioritet olmalıdır. Bunu zəruri edən bir digər amil isə, heç şübhəsiz yerləşdiyimiz coğrafiyada müharibə şəraitində olmağımızdır. Biz çox mürəkkəb bir coğrafiyada yaşayan və ərazi bütövlüyünün təmin olunmasına çalışan bir xalqıq. Hamıya məlum olduğu kimi bu da ancaq güclü dövlət, güclü ordu ilə mümkün ola bilər. Regionda baş verən son hadisələr də bunu bir daha göstərdi.

 

  • Bu baxışlar yəqin platformanızda da öz əksini tapacaq. Platformanızdan bəzi başlıqları bölüşə bilərsiniz?

Təbii ki, baxışlarım platformamda özünü əks etdirəcək. Qısa olaraq onu deyə bilərəm ki, platformamı ölkənin islahat gündəmindəki prioritet məsələlər təşkil edəcək.

İlk öncə, Milli Məclisi ümumilikdə işləyişi, fəaliyyəti ilə bağlı çox qısa. Parlamentin buraxılma səbəblərində də qeyd olunduğu kimi artıq yeni inkişaf dövrü üçün yeni Milli Məclis formalaşmalıdır. Yeni Məclis sadəcə üzlükdə yenilik kimi başa düşülməməlidir. O, təfəkkürdə yenilik gətirməlidir. Bu baxımdan mənim üçün əhəmiyyətli olan Milli Məclisin fəaliyyətində şəffaflıq hesabatlılığın yüksək səviyyədə təmin olunmağıdır. Çox təəssüf ki, Parlament bu məsələdə çox geridədir. Platformamda bu məsələyə xüsusi diqqət ayıracağam.

Birmənalı olaraq, Məclis şəffaf olmalıdır. Xalqdan uzaq yox, əksinə ona yaxın və əlçatan olmalıdır. Bunun üçün bəzi təkliflərimiz olacaq. Məsələn, ilkin olaraq təklif edəcəyik ki, Milli Məclisin onlayn televiziyası qurulsun və qapalı olmayan Milli Məclis müzakirələri, dinləmələri burada yayımlansın. Müzakirələr xalqa açıq olmalıdır. Xalq bilməlidir nə müzakirə olunur, kim nə deyir? Xalq sadəcə nəticədən məlumatlı olmamalı, prosesin özünü də izləməlidir. İzləmək həm də nəzarət etməkdir. Bu mənada Məclisin fəaliyyətinin onlayn yayım bir növ ictimai nəzarətin formasıdır.

Bu çoxdan baş tutmalıydı. Amma təəssüf baş tutmayıb. Səhv etmirəmsə, Milli Məclisin ümumilikdə sosial şəbəkələrdə hər hansı bir rəsmi hesabı yoxdur. Çox gecikib parlament bu məsələdə. Bu səbəbdən bu, bizim üçün çox vacibdir. Millət vəkili seçiləcəyim təqdirdə, davamlı bunu təklif edib və televiziyanın formalaşdırılmasına çalışacağıq.  Bunun üçün elə də ciddi maliyyə vəsaiti də tələb olunmur. Müxtəlif onlayn platformalardan, sosial media hesablarından (YouTube, Facebook və s.) istifadə etməklə bu baş tuta bilər. Artıq smartfonlarla belə bunu etmək çox rahatdır.

Milli Məclis səviyyəsində buna nail olmasaq, öz fəaliyyətimizdə bunu təmin edəcəyik.

 

  • Rəqibləriniz lə bağlı nələr demək istərdiniz?

Biz əsas diqqət və enerjimizi rəqiblərə yox seçicilərimizə yönəltmək niyyətindəyik. Ümid edirəm onlar da bu düşüncədədirlər.

Çünkü qabağımızıda böyük vəzifələr dayanır: seçicilərin seçkilərdə iştirakını təmin etmək. Əfsuslarla da olsa etiraf etməliyik ki, əvvəlki deputatların qeyri-qənəatbəxş fəaliyyəti seçicilərdə seçkilərə marağı azaldıb. Biz bunun üçün xüsusi çalışırıq. Çalışırıq ki, xalqda seçkilərə marağı yenidən bərpa edək. Zənnimcə rəqiblərim də ilk növbədə buna çalışmalıdır.

Fürsətdən istifadə edib onların hər birinə uğurlar arzulayıram. Ümid edirəm ki, bu parlament seçkilərində seçicilərə “səviyyəli rəqabət” nümayiş etdirəcəyik.